જગતની રીત
જગતની રીત જુદી છે એને કેમ કરી સમજાય
સમજુને બધું સવળું લાગે ગભરૂડા ગુંચવાય
તરસ્યા હોય એને તડકામાં ઝાંઝવા નદિયું જણાય
સિંહ શિયાળિયા છેતરાયે નહિ હરણાં છેતરાય જાય
રાંકા કોઈનું બગાડે નહીને મુત્સદી મારી ખાય
હરાડા કોઈના હાથ આવે નહિ પાળેલ પરોણા ખાય
શ્વાનના ઘેર પણ સર્જનહાર તારે આવડો ક્યા અન્યાય
પાપી નરની પડખે ચડે નહિ રાંક ને કરડી ખાય
'દાદ' ઠાલાને તરતા દીઠા ભરેલા ડૂબી જાય
નીતિ નાં ખોટા ઘામાં નાં'વે સોજા સલવાઈ જાય.
- કવિ દાદ (દાદુદાન ગઢવી)